Польскі банк Millennium не адкрывае рахункі па часовым пасведчанні замежніка

На цяперашні момант банк Millennium  не мае магчымасці адкрываць рахункі асобам, якія валодаюць толькі часовым пасведчаннем асобы замежніка. Такія дакументы выдаюць, напрыклад, беларусам, якія падаліся на атрыманне палітычнага прытулку ў Польшчы і чакаюць рашэння па сваёй справе.

Пра гэта гаворыцца ў афіцыйным адказе банка наконт праблемы адкрыцця асабістых банкаўскіх рахункаў для грамадзян і грамадзянак Беларусі ў Польшчы, які атрымаў Цэнтр беларускай салідарнасці.

Прычынай называюць абавязковыя патрабаванні фінансавай бяспекі, якія вынікаюць з польскага заканадаўства аб супрацьдзеянні адмыванню грошай і фінансаванню тэрарызму (AML/CFT), у прыватнасці артыкула 34 адпаведнага закона.

Разам з тым банк прызнае сацыяльную значнасць і актуальнасць гэтай праблемы. У Millennium кажуць, што працуюць над унутранымі зменамі, каб у будучыні такія кліенты маглі адкрываць асабістыя рахункі. Аднак канкрэтныя тэрміны такіх зменаў у банку не назвалі. 

Праблема з банкаўскімі рахункамі ў Польшчы даволі актуальная для беларускіх палітуцекачоў. Асабліва вострай яна з'яўляецца для экс-палітвязняў, якіх выслалі з краіны без дакументаў.