Ва Украіне загінуў камандзір вялікага дэсантнага карабля РФ "Цэзар Кунікаў"

Ва Украіне загінуў Аляксандр Чырва, капітан трэцяга рангу, камандзір расійскага вялікага дэсантнага карабля "Цэзар Кунікаў" 197-й брыгады дэсантных караблёў Чарнаморскага флоту РФ. Пра гэта паведаміў у сацсетках губернатар Севастопаля Міхаіл Развазжаеў. Паводле яго слоў, ён "памёр ад ран" і з ім ужо развіталіся.

Мяркуецца, што Чырва быў цяжка паранены падчас абстрэлу ўкраінскімі вайскоўцамі расійскіх караблёў у порце акупаванага Бярдзянска. Адбылося гэта 24 сакавіка. Тады быў патоплены карабель "Саратаў", а "Цэзар Кунікаў" і дэсантны карабель "Навачаркаск" былі пашкоджаны.

У некралогу напісана, што Аляксандр Чырва "у 2015 і 2016-м гадах удзельнічаў у правядзенні спецыяльнай аперацыі на тэрыторыі Сірыйскай Арабскай Рэспублікі".