Унук Лукашэнкі стаў бізнесменам і зарэгістраваў фірму ў "аршанскім афшоры"

05/08/2025 - 12:11

Чым займаецца ўнучак Лукашэнкі? / Euroradio

Упершыню ў гісторыі эпохі кіравання Аляксандра Лукашэнкі член яго сям’і зарэгістраваў прыватны бізнес. Гэтым шчаслівым сваяком стаў унук Лукашэнкі — Аляксандр Лукашэнка-малодшы, сын Віктара і Ліліі Лукашэнка. Пра гэта даведаліся расследавальнікі "Бюро".

Дваццацігадоваму Аляксандру Лукашэнку-малодшаму належыць 20% кампаніі "Сезон упакоўкі", якая з’явілася 2 чэрвеня 2025 года.

Кампанія ўнука Лукашэнкі плануе займацца вытворчасцю гафрыраванай паперы і кардону, папяровай і кардоннай тары. Яна зарэгістравана ў асаблівай эканамічнай зоне "Брэміна-Орша". Гэта месца называюць "аршанскім афшорам" з-за шырокіх ільгот і прэферэнцый, якімі яе забяспечыў дзед Аляксандра асабіста сваім указам.

Праз тыдзень пасля рэгістрацыі кампанія "Сезон упакоўкі" змяніла адрас і пераехала ў Болбасава, на тэрыторыю "Брэміна-Оршы", дзе базуюцца фірмы-"кашалькі" Лукашэнкі.

Ці ўвайшла яна ў склад асаблівай эканамічнай зоны і ці атрымала ільготы — невядома: у чэрвені "Брэміна груп" раптоўна схавала спіс яе рэзідэнтаў, піша "Бюро".

Што гэта значыць для будучыні Беларусі?

У каментары для "Бюро" дацэнт Інстытута міжнародных адносін і палітычных навук Віленскага ўніверсітэта Віціс Юрконіс звярнуў увагу на тое, што атачэнне сям’і Лукашэнкі не бачыць іншых альтэрнатываў, акрамя супрацоўніцтва з аўтарытарнымі краінамі.

— Тое, што ўсё вакол Лукашэнкі завязанае на сям’ю, нядзіўна, калі ўлічыць, што кіраўнік рэжыму Беларусі не маладзее. Дзіўна, вядома, паставіць у бізнэс унука з такім імем, таму што хочаш не хочаш – гэта відавочная сувязь у плане палітычна афіляваных людзей, таму што ў краінах, якія кіруюцца прынцыпамі свабоднага рынку, празрыстасці, прававой дзяржавы, такая блізкасць да палітычнай вертыкалі адразу выклікала б дадатковыя пытанні. І гэта навязвае думку, што ніхто ў атачэнні сям’і Лукашэнкі сур’ёзна і не разглядае нейкія іншыя альтэрнатывы [супрацоўніцтва], апрача Расіі, Кітая і падобных краін, — адзначае Віціс Юрконіс.

Што яшчэ вядома пра ўнука-бізнесмена?

Унук Аляксандра Лукашэнкі вучыцца ў Інстытуце бізнесу БДУ. Ён вывучае бізнес-адміністраванне з англійскай мовай. Дарэчы, навучанне там платнае.

Па выніках першага курса ў 2023 годзе сярэдні бал унука Лукашэнкі — 9,5.

На "выдатна" Аляксандр Лукашэнка-малодшы здаў "Гісторыю беларускай дзяржаўнасці", а таксама "Арганізацыю прадпрымальніцкай дзейнасці", АБЖ, азнаямленчую практыку і філасофію. Астатнія адзнакі — "дзявяткі".