Ультраправыя-пераможцы выбараў у Аўстрыі не трапілі ва ўрадавую кааліцыю

Ультраправая Партыя свабоды, якая восенню 2024-га выйграла парламенцкія выбары ў Аўстрыі, не трапіла ва ўрадавую кааліцыю. Пра яе стварэнне дамовіліся цэнтрысцкія партыі. Перамовы працягваліся пяць месяцаў (гэта самае працяглае фармаванне кааліцыйнага ўраду ў гэтай краіне).

Урад сфармуюць правацэнтрысцкая Аўстрыйская народная партыя (яе лідар Крысціян Штокер можа стаць канцлерам), левацэнтрысцкая Сацыял-дэмакратычная партыя і "Новая Аўстрыя і ліберальны форум".

На парламенцкіх выбарах Партыя свабоды атрымала 29%. Лідары іншых партый адразу аб'явілі, што не маюць намер уступаць у кааліцыю з кіраўніком правых Гербертам Кіклем. Так і сталася. Абураны Кікль назваў сапернікаў "кааліцыяй няўдачнікаў".