У свет выходзіць кніга пра знакаміты мінскі некропаль

У выдавецтве “Выдавец Цымбераў Р.М.” выходзіць кніга, прысвечаная гісторыі Вайсковых могілак Мінска. На падставе архіўных матэрыялаў, перыёдыкі, успамінаў мінчукоў упершыню падрабязна прадстаўлена гісторыя гэтага знакамітага некропаля.

У кнізе распавядаецца пра гістарычныя, мастацкія і моўныя асаблівасці могілак. Аўтары — Юрый Тамковіч і Павел Каралёў — закранаюць пытанне належнай аховы і вывучэння некропаля, захавання яго ўнікальнасці — ад простых самаробных помнікаў да манументальных абеліскаў.

У выданні змешчана багата фотаздымкаў. Таксама змешчаны спіс пахаваных з надмагілымі надпісамі, што можа дапамагчы сваякам у пошуку блізкіх.

Кніга разлічана на спецыялістаў у галіне некрапалістыкі, а таксама будзе карыснай усім, хто цікавіцца гісторыяй і культурай Беларусі.