Кнігі пра вайну ва Украіне і сітуацыю ў Беларусі выкраслілі з польскай прэміі

Дырэктар музея Асвенціма Пётр Цывінскі адмовіўся ад старшынства ў міжнароднай прэміі імя Вітольда Пілецкага.

Ён зрабіў гэта на знак пратэсту супраць рашэння Інстытута Пілецкага. Гэтая ўстанова сёлета не дапусціла да конкурсу кнігі аб расійскай агрэсіі ва Украіне і сітуацыі ў Беларусі, для якіх была асобная катэгорыя ў конкурсе, піша wyborcza.pl. Інстытут Пілецкага спасылаецца на адсутнасць фінансаў.

Міжнародная прэмія імя Вітольда Пілецкага — літаратурная ўзнагарода. Яе прысуджаюць за кнігі, якія закранаюць тэму польскага супрацьстаяння таталітарным сістэмам, а таксама за кнігі, што асвятляюць сітуацыю з месцаў, ахопленых узброенымі канфліктамі ці асаблівай пагрозай чалавечай годнасці.

Заснавальнікам прэміі з'яўляецца Інстытут Пілецкага, а партнёрам да мінулага года быў дзяржаўны музей Аўшвіц-Біркенаў (Асвенцім).

Вітольд Пілецкі — афіцэр польскага войска, удзельнік Супраціву. Ён добраахвотна здаўся ў палон, каб трапіць у канцлагер у Асвенціме для атрымання інфармацыі і падпольнай працы. Уцёкшы з лагера, ён першым перадаў на Захад звесткі пра тое, што адбываецца ў лагеры смерці. Прымаў удзел у Варшаўскім паўстанні.