У Мінскім раёне дзяржкантроль накрыў тры дамы састарэлых
Яны не мелі ліцэнзіі на аказанне паслуг / Комитет госконтроля
Падмяўшы пад сябе рынак сацыяльных паслуг, дзяржава працягвае закрываць прыватныя дамы састарэлых, якія не атрымалі ліцэнзію. Так у Мінскай вобласці Камітэт дзяржкантролю закрыў тры пансіянаты, што аказвалі паслугі пажылым беларусам.
Два юрыдычныя асобы і індывідуальны прадпрымальнік з лістапада 2024 года па верасень 2025 года на тэрыторыі Мінскага раёна арганізавалі працу дамоў састарэлых, разлічаных на пражыванне больш як 25, 85 і 40 чалавек адпаведна.
Па факце ажыццяўлення прадпрымальніцкай дзейнасці без ліцэнзіі ў дачыненні да дырэктараў дзвюх арганізацый і індывідуальнага прадпрымальніка ўзбуджаныя крымінальныя справы.
Гісторыя пытання
Нагадаем, што з 1 кастрычніка 2024 года ў Беларусі пачало дзейнічаць ліцэнзаванне працы сацыяльных пансіянатаў прыватных формаў уласнасці. З-за гэтага амаль усе прыватныя дамы састарэлых фактычна закрыліся.
Пры гэтым дзяржава абяцае ў бліжэйшыя пяць гадоў павялічыць іх колькасць амаль на 20%.
У Беларусі пакуль дзейнічаюць 89 сацыяльных пансіянатаў.
