У мінскіх крамах стала менш беларускіх тавараў

У мінскіх крамах знізілася доля беларускіх тавараў. Пра гэта заявіла першая намесніца старшыні Мінгарвыканкама Надзея Лазарэвіч.

Удзельная вага беларускіх харчовых тавараў на паліцах крамаў за 2024 год паменшала на 0,9 працэнтнага пункта, адзначыла чыноўніца. Найбольш істотнае скарачэнне заўважана ў мучных і цукровых вырабах, макаронах і крупах. У дзіцячым харчаванні доля беларускіх вырабаў знізілася на 6%.

Лазарэвіч мяркуе, што заняцца гэтай праблемай мусяць адміністрацыі сталічных раёнаў разам з прадстаўнікамі буйных гандлёвых сетак. Яна прапанавала, напрыклад, прыярытэтную выкладку тавараў беларускай вытворчасці, у тым ліку ў прыкасавай зоне.

Чыноўніца кажа, што беларускія вытворцы гатовыя пастаўляць у продаж прадукцыю ў большым аб'ёме. Але тым не менш па некаторых групах тавараў "ідзе засілле іншай вытворчасці з іншых краін".

Варта адзначыць, што пасля ўвядзення санкцый колькасць імпарцёраў у Беларусь істотна знізілася і асноўныя пастаўкі цяпер ідуць з Расіі.