У Мінэканомікі назвалі свае прычыны разгону інфляцыі

Павышэнне рэгуляваных тарыфаў і рост цэн на імпартныя тавары прывялі да росту інфляцыі ў Беларусі. Такі каментар апублікавала Міністэрства эканомікі

"Гадавая інфляцыя некалькі паскорылася і ў красавіку склала 6,5%. Гэта звязана з прынятымі рашэннямі па павышэнні рэгуляваных цэн (тарыфаў), а таксама з ростам цэн на некаторыя пазіцыі тавараў, пераважна імпартаваныя", — заявілі ў ведамстве.

Верагодна, гэта стала рэакцыяй на аналітыку Еўразійскага банка развіцця (ЕАБР). Расійскія эксперты ў заявілі, што цэны ў Беларусі растуць з такіх прычынаў, як адмена дзяржрэгулявання на кошты некаторых тавараў, аслабленне беларускага рубля да расійскага і сезоннае змяненне цэн на гародніну і садавіну.

Дзяржрэгуляванне было ўведзенае ў кастрычніку 2022-га, а ў красавіку 2025-га са спісу быў выкраслены шэраг пазіцый.

На 2025 год афіцыйны Мінск плануе ўтрымаць інфляцыю на ўзроўні да 5%.