У Магілёве ўжо зарэгістраваны першы ўкус кляшча

У Магілёве ўжо зарэгістраваны першы ўкус кляшча. Такі сюрпрыз прынеслі анамальна цёплыя для зімы ўмовы надвор’я. Пра першы зварот пацярпелага паведаміў Магілёўскі занальны цэнтр гігіены і эпідэміялогіі. Там адзначаюць, што ранняму з'яўленню кляшчоў паспрыяла тэмпература паветра, якая пераважна была вышэйшая за 0°C, і адсутнасць снежнага покрыва.

"Пры такой "мяккай" зіме можна сутыкнуцца з кляшчамі, хаця і не ў тых колькасцях, як вясной, — папярэджваюць спецыялісты. — У сувязі з анамальнымі ўмовамі надвор’я існуе рызыка нападу кляшчоў як на чалавека, так і на жывёл".

Летась у Магілёве і Магілёўскім раёне па дапамогу да медыкаў звярталася больш за 2 тысячы чалавек, якіх укусілі кляшчы. 30% з іх — дзеці да 17 гадоў.

У 2024-м актыўнасць кляшчоў у канцы студзеня назіралася ў Брэсцкай вобласці. І гэта былі адзінкавыя выпадкі. Па ўсёй краіне яны актывізаваліся, калі зіма адступіла. Спецыялісты заяўляюць, што ў РБ кляшчоў стала ў паўтара разу больш.