У івацэвіцкай калоніі ўключылі ацяпленне пасля навіны пра смерць вязня

У івацэвіцкай папраўчай калоніі №22 "Ваўчыныя норы" ўключылі ацяпленне пасля навіны пра смерць зняволенага.

Як адзначаюць праваабаронцы MAYDAY TEAM, па распараджэнні начальства ацяпленне ўключылі ў суботу, хаця гэта выходны дзень. Праваабаронцы мяркуюць, што агалоска факту смерці вязня падштурхнула адміністрацыю да гэтага кроку.

Паведамляецца, што зняволенаму мужчыну было каля 50 гадоў, у калонію ён трапіў разам з сынам.

Таксама праваабаронцы кажуць, што атрымалі інфармацыю пра некалькі смерцяў у івацэвіцкай калоніі за мінулы месяц, але не могуць ні пацвердзіць, ні абвергнуць гэтыя звесткі.

Напрыканцы красавіка яны паведамлялі пра эпідэмію кавіду ў івацэвіцкай калоніі. Гаварылася, што вязні хварэюць цэлымі атрадамі, а лекуюць іх толькі парацэтамолам. Тады ж паведамлялася, што частку самых цяжкіх хворых адправілі ў Рэспубліканскую турэмную бальніцу ў Мінск. Пры гэтым адміністрацыя калоніі не ўключала ацяпленне нават пасля таго, як наступілі замаразкі.