У Індыі расследуюць знікненне ў Беларусі свайго грамадзяніна
Дыпак Кумар / indianexpress.com
У Індыі расследуюць знікненне ў Беларусі свайго грамадзяніна. Летам мінулага года Дыпак Кумар спрабаваў нелегальна патрапіць у Еўрасаюз. З таго часу пра яго лёс няма звестак. Крымінальную справу аб махлярстве і змове распачалі ў дачыненні "турыстычных агентаў", якія арганізавалі небяспечнае падарожжа грамадзяніна Індыі, піша indianexpress.com.
Пра знікненне свайго 26-гадовага сына ў паліцыю заявіў бацька. Паводле яго слоў, сын імкнуўся патрапіць у Партугалію. Згаданыя "агенты" паабяцалі зрабіць шэнгенскую візу за 13400 долараў. Індыйца праз Дубай адправілі ў Расію. Яму нібыта абяцалі пералёт адтуль адразу ў Нідэрланды. Але ў выніку Дыпак Кумар апынуўся ў Беларусі. Яму абяцалі хутка пераправіць у Нідэрланды. Аднак адабралі пашпарт і грошы. Апошні раз сваякі размаўлялі з мужчынам па тэлефоне 23 ліпеня 2024-га. З таго часу тэлефон выключаны.
