У Германіі за парушэнне антырасійскіх санкцый ЕС арыштавалі грамадзянку Беларусі

У Германіі за парушэнне антырасійскіх санкцый ЕС узялі пад варту 46-гадовую грамадзянку Беларусі. У апошнія гады яна разам з двума іншымі асобамі вывезла ў РФ "мноства аўтамабіляў". З сакавіка 2022-га ў Расію нельга было адпраўляць аўтамабілі коштам больш за 50 тысяч еўра, а з чэрвеня 2023-га забарона дзейнічае незалежна ад іх кошту.

Як піша presseportal.de, абвінавачаныя пры дэклараванні легкавікоў на экспарт "стваралі ўражанне", што вывозяць іх не ў РФ, а ў Беларусь, Кыргызстан, Таджыкістан і Узбекістан. Высветлілася, што 186 з іх пасля былі зарэгістраваныя ў Расіі.

Беларуску падазраюць у парушэннях закона аб знешнім гандлі. Мяркуецца, што яна і яе кампаньёны вывезлі з Германіі 192 аўтамабілі агульным коштам больш за 21 мільён еўра. У іх канфіскаваныя чатыры аўтамабілі прэміум-класа, два прычэпы-рэфрыжэратары.