У Асіповічах дзяўчына выратавала хлопчыка, які праваліўся пад лёд

У Асіповічах дзяўчына выратавала 10-гадовага хлопчыка, які праваліўся пад лёд. Як пішуць ратавальнікі, школьнік вырашыў праверыць таўшчыню лёду ў штучным вадаёме ў гарадскім парку. Але на адлегласці каля 2,5 метра ад берага пад ім разламаўся лёд і ён апынуўся ў вадзе.

Крыкі пачула 15-гадовая Карына Страшкевіч. Дзяўчына выцягнула хлопчыка з вады.

На месца прыехалі медыкі, якія агледзелі хлопчыка. На шчасце, ён не пацярпеў і ў шпіталізацыі не мае патрэбы.

"Сёння ішлі, гулялі з сябрамі па парку. Бачым: упаў хлопчык пад лёд, — расказвае дзяўчына прэс-службе ратавальнікаў. — Я проста вырашыла ўзяць усё ў свае рукі... Проста вырашыла яго выратаваць... Хлопчыка я не ведаю, першы раз бачу".