Трамп захацеў арганізаваць тэлефонную размову з Пуціным

Дональд Трамп даручыў сваім памочнікам арганізаваць тэлефонную размову з прэзідэнтам РФ Уладзімірам Пуціным на працягу некалькіх дзён пасля сваёй інаўгурацыі. Аб гэтым паведаміла CNN са спасылкай на крыніцы, знаёмыя з сітуацыяй.

Паводле інфармацыі тэлеканала, прадстаўнікі каманды Трампа, якія адказваюць за нацбяспеку, пачалі працаваць над арганізацыяй размовы яшчэ некалькі тыдняў таму. Невядома, ці была вызначана дата размовы.

У час перадвыбарнай кампаніі Трамп абяцаў спыніць расійска-ўкраінскую вайну на працягу сутак пасля сваёй інаўгурацыі. Аднак зараз размова ідзе аб пачатку перагаворнага працэсу.

У Крамлі дэкларавалі гатоўнасць да абмеркавання шэрагу пытанняў з Трампам, аднак ніякай канкрэтыкі не паведамлялася.