Сяброўка КР Вольга Карпушонак абвінавачвае Латушку ў дамаганнях. Ён абвяргае

Чаліня Каардынацыйнай рады Вольга Карпушонак абвінаваціла кіраўніка НАУ і члена Кабінета Паўла Латушку ў “ціску, гвалце і сексуальным дамаганні”. Пра гэта яна напісала на сваёй старонцы ў Фэйсбуку. Латушка ўсё адмаўляе і гаворыць пра працу спецслужбаў.

“Павел асабіста і праз калег запрасіў мяне працаваць у НАУ, паабяцаўшы пратэкцыю, грошы і спакой”, піша Вольга.

“У выніку я сутыкнулася з сексуальнымі дамаганнямі з боку гэтага чалавека — калі яго можна так назваць. Больш за тое, з-за маёй адмовы ён пагражаў мне праблемамі ў Польшчы, абяцаў распавесці пра мяне такое, што мяне альбо пасадзяць у турму, альбо вышлюць у Беларусь, таму што яго слова супраць майго мае вагу, і павераць менавіта яму”, сцвярджае Карпушонак.

Павел Латушка ў адказ на яе абвінавачанні паведаміў:

“Усе звесткі, што змяшчаюцца ў публічных заявах Вольгі Карпушонак, з’яўляюцца паклёпам. Я як публічная асоба вымушаны буду абараняць сваю рэпутацыю ўсімі даступнымі прававымі спосабамі. Таксама не выключаю магчымасці падачы іскавай заявы ў суд аб абароне гонару і дзелавой рэпутацыі”.

Латушка сцвярджае, што гатовы “прайсці вочную стаўку, пры неабходнасці — паліграф”. 

“Упэўнены, што гэта праца спецслужбаў рэжыму”, падкрэслівае палітык.

Па словах Латушкі, “у камандзе НАУ ўзніклі падазрэнні ў дачыненні да Вольгі Карпушонак наконт магчымай супрацы са спецслужбамі замежнай дзяржавы. Пасля гэтага ёй было прапанавана прайсці паліграф. Пасля гэтай прапановы яна спыніла супрацу з камандай НАУ у якасці валанцёра”.

“Мы не раз казалі і даказвалі, што супраць мяне асабіста і каманды Народнага антыкрызіснага ўпраўлення ідзе адкрытая, сістэмная, матываваная вайна. Гэта частка іх стратэгіі па супрацьдзеянні нашай дзейнасці”, нагадвае Латушка.

У Каардынацыйнай радзе Вольга Карпушонак з’яўляецца чаліняй фракцыі “Хопіць баяцца”, якую ўзначальвае блогерка Таццяна Мартынава.