Стала вядома, з чым звязаныя затрыманні арганізатараў канцэртаў — "Наша Ніва"

Пад канец лета стала вядома пра шэраг затрыманняў сярод арганізатараў канцэртаў. Спачатку паведамлялася пра затрыманне дырэктара Палаца Рэспублікі Максіма Прыхадоўскага. Потым стала вядома, што ў СІЗА аказаліся кіраўнікі івэнт-кампаній Ілля Піятроўскі з Blackout Studio і Аляксандр Манышаў, які мае дачыненне да агенцтваў "Атам Інтэртэйнмэнт" і "Анбрэйкбл", што абслугоўвалі праўладныя мерапрыемствы. Таксама паведамлялася пра затрыманне кіраўніцтва Kvitki.by.

Усе гэтыя затрыманні звязаныя з чатам "Орг BY" , які прызналі экстрэмісцкім фармаваннем, піша "Наша Ніва". Паводле версіі КДБ, да гэтага чата меў дачыненне дырэктар Kvitki.by Аляксандр Касінскі.

Чат знайшлі на тэлефоне ў аднаго з затрыманых, пасля чаго пайшлі па іншых яго ўдзельніках.

У каментары выданню адзін з удзельнікаў "Орг BY", які знаходзіцца ў эміграцыі, расказаў, што стварылі яго ў першай палове 2020 года — для каардынацыі працы ў прафесійнай сферы. Арганізатары канцэртаў дзяліліся адзін з другім досведам ва ўмовах кавіду.

"Там мы проста дзяліліся працоўным досведам, нешта маглі адзін аднаму параіць. Нічога "экстрэмісцкага" ў чаце дакладна не было, было ўсё пра Беларусь, пра будучыню, пра нейкі пазітыў яшчэ", — цытуе НН словы ўдзельніка. Паводле яго, у 2021‑м усе дыялогі ў чаце скончыліся.

Крыніца выдання кажа, што кіраўнікі Kvitki.by пачалі супрацоўнічаць са следствам, таму іх выпусцілі з-за кратаў.

"А вось той жа Ілля Піятроўскі з Blackout Studio яшчэ сядзіць. Па-першае, ён ніяк не хоча прызнаваць выстаўленыя яму абвінавачванні ва ўхіленні ад падаткаў. Па-другое, яго маскоўская жонка яму наняла адразу расійскіх адвакатаў, якія сябе агрэсіўна паводзілі, таму яго не выпусцілі, хаця ён мог выйсці пад заклад і быць дома", — прыводзіць выданне словы крыніцы.

Таксама за кратамі знаходзіцца яшчэ адзін прадстаўнік Blackout Studio Валерый Калеснікаў. Нейкі час ён нават быў у адной камеры з Аляксандрам Манышавым з "Атам Інтэртэйнмэнт".

Дагэтуль няма на працоўным месцы і кіраўніка Палаца Рэспублікі Максіма Прыхадоўскага, хаця на сайце ўстановы ён па-ранейшаму пазначаны як дырэктар.