Стала вядома, якія дрэвы больш не будуць высаджваць у Мінску
Каштан, ілюстрацыйнае фота / pixabay.com
У Мінску плануюць высаджваць толькі тыя дрэвы, якія вытрымліваюць мясцовую экалогію. Адпаведныя выпрабаванні правяла Акадэмія навук. Пра гэта інфармагенцтву "Мінск-Навіны" заявіў старшыня Мінгарсавета Арцём Цуран.
Сталічныя ўлады вырашылі адмовіцца ад высадкі каштанаў, таполяў і бярозаў, бо яны вельмі кепска прыжываюцца.
"У асноўным высаджваюцца ясень, клён і шэраг іншых дрэў. Менавіта тыя, якія прыжываюцца і вытрымліваюць, што самае галоўнае, солевую і агульнагарадскую нагрузку", — паведаміў Цуран.
Таксама ён сказаў, што пасля завяршэння будаўніцтва трэцяй лініі метро ў парку Дружбы народаў каля плошчы Бангалор правядуць кампенсацыйныя пасадкі раслін — наўзамен тых, што знішчылі пры будаўніцтве.
