Спіс палітвязняў павялічыўся яшчэ на дзевяць чалавек

Праваабаронцы прызналі палітвязнямі яшчэ дзевяць чалавек. Гэта Глеб Нікановіч, Ігар Ляшкевіч, Ціхан Шлюхціц, Арцём Майсіёнак, Андрэй Абразцоў, Канстанцін Шульга, Данііл Дарафееў, Сяргей Красоўскі і Міхаіл Лапенас. Агульная іх колькасць вырасла да 942 чалавек.

Як пішуць праваабаронцы "Вясны", гэтыя ўдзельнікі акцый пратэсту праходзяць па ч. 1 артыкула 342 Крымінальнага кодэкса ("Групавыя дзеянні, якія груба парушаюць грамадскі парадак"). Акрамя таго, Міхаіл Лапенас асуджаны па арт. 368 і 369 КК (абраза прэзідэнта Беларусі і абраза прадстаўніка ўлады).

Праваабаронцы патрабуюць неадкладна вызваліць згаданых палітвязняў і спыніць іх крымінальны пераслед. Таксама яны заклікаюць неадкладна вызваліць усіх палітычных зняволеных, а таксама людзей, затрыманых за ўдзел у мірных сходах, і спыніць палітычныя рэпрэсіі супраць грамадзян краіны.

Пад заявай падпісаліся праваабарончы цэнтр "Вясна", Беларускі дом правоў чалавека імя Барыса Звозскава, "Прававая ініцыятыва", Беларускі ПЭН-цэнтр, Беларуская асацыяцыя журналістаў, Ідэнтычнасць і права.

Сёння зранку палітвязнямі былі прызнаныя яшчэ шасцёра зняволеных.