Слаўгарадскія міліцыянты працавалі пад выглядам ашуканцаў

Звычайна пры тэлефанаванні махляры прыкідваюцца міліцыянтамі, а ў Слаўгарадзе адбылося роўна наадварот — міліцыянты прыкінуліся махлярамі.

Разам з журналістамі мясцовай раённай газеты яны правялі такі эксперымент. Міліцыянты затэлефанавалі мясцовай жыхарцы і назваліся супрацоўнікамі фірмы, якая займаецца дамафонамі. Яны папрасілі ў жанчыны асабістыя даныя і аднаразовы код — і яна, не задумваючыся, прадыктавала іх. Такім чынам жанчына магла застацца без усіх сваіх ашчаджэнняў.

Відэа з такім эксперыментам журналісты слаўгарадскай раёнкі размясцілі ў TikTok.

Каментатары здзівіліся такім паводзінам міліцыі і яшчэ раз задумаліся, чаму ў Беларусі пенсіянеры такія даверлівыя, калі пра тэлефоннае махлярства расказваюць з усіх магчымых крыніц.