Розніца ў заробках мужчын і жанчын у Беларусі павялічылася

У Беларусі падлічылі гендарны разрыў у сярэднегадзіннай заработнай плаце. Нацыянальны статыстычны камітэт апублікаваў звесткі на кастрычнік 2024 года.

Розніцу ў аплаце працы ацэньвалі па двух напрамках. Першы — нескарэктаваны гендэрны разрыў. У ім падлік ідзе па ўсіх работніках без уліку індывідуальных характарыстык. Другі напрамак улічвае ўзровень адукацыі, сферы дзейнасці, стаж ды іншыя фактары.

У другім, скарэктаваным напрамку мужчыны апераджаюць жанчын у заробках на 6%. паводле звестак Белстата 2021 года гэты разрыў складаў 5,8%, адзначае Office Life.

А розніца без уліку сфер дзейнасці, адукацыі, стажу ды іншых нюансаў склала 26,8%. За тры гады да таго мужчыны зараблялі на 24,3% больш за жанчын.

Розніцу ў заробках не аднойчы прызнавала і Мінпрацы. Там называлі лічбу ў 20-25%. Такі разрыў чыноўнікі тлумачылі тым, што жанчыны ў Беларусі зазвычай працуюць пераважна ў бюджэтнай сферы, а мужчыны — на так званых "шкодных працах".