Рост коштаў на рынках будуць рэгуляваць. Што не так з рашэннем чыноўнікаў?

— Па-першае, адмена рэгулявання коштаў была частковай і не тычылася ўсіх прадуктаў. Напрыклад, на пельмені рэгуляванне коштаў адмянялі, а на чабурэкі не, а цяпер усё вяртаецца назад. 
Чыноўнікі пратрымаліся два з невялікім месяцы.

Горш таго, гэты ж МАРГ цяпер збіраецца прыняць іншую пастанову — пра тое, каб рэгуляваць кошты ўжо непасрэдна на рынках. Па нармальнай логіцы можна было б падумаць: так, мы можам вырашыць праблему дэфіцыту шляхам адмены цэнавага кантролю. Але чамусьці гэта не працуе.

І вось цяпер да нас гэты цэнавай кантроль вяртаецца — магчыма, нават у горшых формах, чым быў раней, таму што раней цэны на рынках не рэгулявалі.

Сэнс рынку такі: прадавец прадае бульбу па пяць рублёў, пакупнік просіць аддаць яму яе за тры, у выніку абодва сыходзяцца на чатырох. Гэта называецца кампраміс, у гэтым — сэнс рынку. А цяпер дзяржава патрабуе, каб у кожнага гандляра на рынку быў пісьмовы дакумент — паперка з абгрунтаваннем правільнага разліку цэн на кожны тавар.

Уявіце сабе: прыехаў фермер з фермы, які павінен даказаць, што прадае сваю бульбу па правільнай цане. А дзе яму ўзяць гэтую паперку? Напэўна, ісці ў Міністэрства гандлю і прасіць, каб там далі?