Як мы "зараблялі грошы" на розніцы курсаў долара

13 кастрычніка курс долара на Беларускай валютна-фондавай біржы падскочыў яшчэ на 300 рублёў. Амерыканская валюта пераадолела псіхалагічны бар’ер у 9000 рублёў і каштуе зараз 9010 рублёў.

Акурат тады, калі на дадатковай сесіі біржы заканчваліся таргі, я набыў у адным з аддзяленняў “Беларусбанку” 50 долараў па 9150 рублёў за долар.

Зрабіўшы гэта, я набыў у краме печыва і пайшоў у рэдакцыю піць гарбату і сачыць за тым, як долар паступова даражэе ў мінскіх абменніках.

Вышэйшым пілатажам было б здаць долары ў тым жа аддзяленні “Беларусбанка”, у якім я набыў іх пару гадзін таму. Але 13 кастрычніка курс долара ўзняўся не так крута, як напярэдадні. У другой палове дня “Беларусбанк” быў гатовы набываць амерыканскія грошы па 9050 рублёў, таму давялося карыстацца паслугамі іншых, больш шчодрых банкаў.

На плошчы Перамогі месціцца аддзяленне “Хоўм Крэдыт Банка”. Таго самага, які яшчэ 12 кастрычніка спрабаваў прадаваць долары па 10 тысяч рублёў. Сёння курс пакупкі долара ў ХКБ — 9210. Калі ў мяне атрымаецца здаць там мае 50 долараў, я зараблю 3000 рублёў. Гэта няшмат, але для пачатку няблага.

У “Хоўм Крэдыт Банку” мяне сустракае доўгая чарга. Але на табло гараць зусім іншыя лічбы, чым у інтэрнэце: выявілася, што долары банк купляе па 9100 рублёў.

“Гэта зараз курс такі стаў, — тлумачаць людзі з чаргі. — Ён толькі што змяніўся, а дагэтуль быў 9210! Таму сабраўся такі натоўп, а зараз усе разыходзяцца. Самыя стойкія засталіся. Ды і мы ўжо не чакаем, што добры курс вернецца. Нам бы проста памяняць!”

Што ж, еду ў “Цэптэр Банк”, дзе ёсць спадзеў здаць долары па 9200, — чарга. Але і тут расчараванне: курс на табло — 9050 рублёў за долар! Тым не менш, у аддзяленні банка мнагалюдна.

— Курс быў 9200. Я тэлефанаваў, даведваўся. Сказалі — 9200. Прыязджаю сюды — 9050! Прыкладна гадзіну таму гэта было, — кажа раздражнёны мужчына сярэдняга веку. Аднак з чаргі не сыходзіць.

— Усе банкі змяняюць курс прыкладна а 13-й гадзіне. Хто не паспеў — той спазніўся! — дзеліцца досведам жанчына, якая таксама застаецца ў чарзе.

Тым часам побач з намі з касы банка выходзяць людзі з вялікімі пачкамі рублёў у руках. Пытаюся ў іх, чаму ўсё ж вырашылі здаць валюту па нізкім курсе. Яны адказваюць, што набылі яе ўчора яшчэ танней.

Раблю для сябе выснову: дзень у дзень лёгкія грошы, бегаючы паміж абменнікамі, зарабіць складана. І пакідаю свае 50 долараў у спакоі да заўтрашняй раніцы.

Тым часам самы вялікі курс, па якім у Мінску можна здаць долары 13 кастрычніка, складае 9100 рублёў. Нескладана заўважыць, што ён на 90 рублёў перавышае біржавы. Гэта значыць, што банкі чакаюць далейшага росту курсу долара на біржы, і будуць выстаўляць заўтра прапановы на ўзроўні ў 9300-9400 рублёў.