Беларусы “гуляюць” на курсе долара, прадаючы кватэры
Уладальнікі кватэр прадаюць іх за рублі па рыначным курсе, каб пасля “укласціся” у новае будаўніцтва па курсе Нацбанка.
Як ні дзіўна, сёння ў Беларусі можна набыць кватэры за беларускія рублі. Яны каштуюць сотні мільёнаў – сапраўдныя валізкі грошай. Але ёсць нюанс: па курсе Нацбанка (10 жніўня гэта 5010 рублёў) вам кватэру ніхто не прадасць.
“На другасным рынку сёння набыць кватэру за беларускія рублі па курсе Нацбанка немагчыма, — кажа намесніца дырэктара агенцтва нерухомасці “Твая сталіца” Святлана Кудзелка. — Той-сёй з гандляроў прадае за беларускія рублі, але заўжды маецца на ўвазе канвертацыя на тым рынку, на якім можна набыць валюту. Таму пра другасны рынак тут гаворкі не ідзе, тут пра першасны рынак”.
Калі ў цану на кватэру адразу закладаецца і кошт канвертацыі, дык чаму б адразу не прадаць яе за долары? У прадаўцоў ёсць дзве прычыны выставіць кватэру на продаж за рублі. Першая — кватэру прадаць трэба як мага хутчэй, а долараў у патэнцыйных пакупнікоў папросту няма. Распавядае намесніца дырэктара агенцтва нерухомасці “Квадратны метр” Ларыса Кулакова.
Ларыса Кулакова: “Я не скажу, што рынак цяпер замер, і што мы сядзім і нічога не робім. Але, тым не менш, наш абарот упаў на вялікі адсотак у сувязі з крызісам. Бо, паўтаруся, гандляры не хочуць прадаваць за рублі. А пакупнікі не могуць купіць долар”.
Другая прычына — жаданне “наварыць” на двайной здзелцы. Кватэра прадаецца за рублі з мэтай неадкладнага ўкладання гэтых рублёў у долевае будаўніцтва!
Ларыса Кулакова: “Ідуць на такія здзелкі толькі тыя гандляры, якія прадаюць старое жыллё, і адразу ўкладаюцца ў новае будаўніцтва. Вось такія здзелкі праходзяць у рублях. А калі казаць пра нашу практыку – ніхто не хоча разлічвацца нацыянальнай валютай”.
Пры гэтым прадаюцца кватэры па рыначным курсе рубля, а ў будаўніцтва можна ўвайсці па курсе Нацбанка! Тое, што “схема” працуе, Еўрарадыё пацвердзіў адзін з буйных мінскіх забудоўшчыкаў — “Арэса-сервіс”:
“Гэта магчыма. Калі ў вас ёсць каналы — прыходзьце!”
Каналы ў журналістаў Еўрарадыё, вядома, ёсць, а вось долараў няшмат. Таму будавацца ў “Арэсу-сервіс” мы пакуль не пойдзем. Але тут да месца заўважыць, што сайт іншага буйнога мінскага забудоўшчыка — “МАПІД” — паведамляе, што “у цяперашні час ТАА “МАПІД” не вядзе долевага будаўніцтва і ў 2011 годзе не плануе яго пачынаць”. Ці не праз неабходнасць прымаць ад дольшчыкаў беларускія рублі па курсе Нацбанка прыняў такое рашэнне забудоўшчык?
Натуральна, людзей, якія “гуляюць” на дынаміцы коштаў на жыллё, няшмат. Справа гэтая рызыкоўная, бо грошы можна не толькі “падняць”, але і страціць, калі здарыцца дэвальвацыя ці рэзка ўпадзе кошт “квадрата”. А грошы вялікія.
“Усяго толькі 8 аб’ектаў [з прыкладна 340. — Заўв. Еўрарадыё] прадаецца ў нас сёння за рублі — вы можаце ўбачыць іх на сайце. Гэта тыя прадаўцы, якім патрэбныя рублі. Уладальнікі гэтых кватэраў, хутчэй за ўсё, хочуць укласці іх у новабудоўлі”, — кажа Святлана Кудзелка.
Адзін з гэтых аб’ектаў — трохпакаёўка ў Малінаўцы, амаль на мінскай кальцавой. Уладальнік хоча за яе 74 тысячы долараў. Магчымы разлік у рублях, а гэта значыць, што прадавец разлічвае атрымаць каля 510 мільёнаў (у залежнасці ад укладзенай канвертацыі). А па курсе Нацбанка гэта ўжо 102 тысячы долараў — кошт амаль у паўтары разы большай трохпакаёўкі ў “Брылевічах”. У новым доме з сучаснай планіроўкай, побач з якім будуецца станцыя метро “Малінаўка”.
