Ратавальнікі кажуць, што не ведаюць пра выбухі пад Мінскам

Ратавальнікі кажуць, што не ведаюць пра выбухі пад Мінскам. У чацвер іх чулі жыхары паўночна-усходняй часткі Мінскага раёна. Пра гэта яны пішуць у мясцовых чатах. Напрыклад, жыхары аграгарадка Калодзішчы пачалі пісаць пра магутныя выбухі, ад якіх "нават сцены трэсліся". Яны нібыта працягваліся на працягу некалькіх гадзінаў. Чулі выбухі ў мікрараёнах Новая Баравая і Азярышча (каля 15-й гадзіны). І яны не падобныя на тыя, што звычайна гучаць на вайсковым палігоне.

Як піша pristalica.by, у Мінскім раённым аддзеле МНС сказалі, што сёння "не паступала ніводнага паведамлення, што дзесьці нешта выбухнула". Таму дагэтуль невядома, што ж насамрэч адбылося на Міншчыне. А на Гомельшчыне мінулай ноччу чулі моцны выбух каля вёскі Зябраўка (там знаходзіцца расійская вайсковая база).