Працаўнікоў БМЗ папярэдзілі пра адказнасць за "экстрэмізм"

Працаўнікоў Беларускага металургічнага завода папярэдзілі пра адказнасць за "экстрэмізм". Зрабілі гэта праз жлобінскую газету "Металург". У ёй надрукавалі ("з мэтай папярэджання здзяйснення злачынстваў экстрэмісцкай накіраванасці") спіс з 17 артыкулаў Крымінальнага кодэксу, па якіх найчасцей судзілі за "палітыку", і тэрміны пакарання.

Высветлілася, што Упраўленне Следчага камітэта па Гомельскай вобласці правяло аналіз крымінальных спраў "экстрэмісцкай накіраванасці", распачатых у рэгіёне. Праз газету паведамляецца, што "большасць злачынстваў экстрэмісцкай накіраванасці, учыненых працаўнікамі ААТ "БМЗ — кіруючая кампанія холдынгу "БМК", выявілася ў наўмысных дзеяннях па арганізацыі групавых дзеянняў, якія груба парушаюць грамадскі парадак, альбо ў актыўным удзеле ў такіх". Атрымліваецца, што людзей каралі найперш за ўдзел у пратэстах 2020 года.

Таксама згадваецца, што працаўнікоў БМЗ судзілі за "распальванне сацыяльнай варажнечы", за змяшчэнне ў інтэрнэце інфармацыі, "накіраванай на дэстабілізацыю грамадскага парадку ў Рэспубліцы Беларусь", "паклёп" на Аляксандра Лукашэнку і "абразы" яго, а таксама чыноўнікаў, суддзяў, сілавікоў і іх сваякоў.

Колькасць асуджаных працаўнікоў БМЗ не паведамляецца.