Пенсіянерка правяла 18 сутак у ІЧУ і стала падазраванай па крымінальнай справе

Цяпер Алена Гнаук зноў у ізалятары, піша TUT.by. Жанчыну затрымалі ў нядзелю, 25 кастрычніка, каля Цэнтральнага ўнівермага. У сераду яе зноў будуць судзіць па арт. 23.34 КаАП за ўдзел у несанкцыянаваным мерапрыемстве.

Пенсіянерку судзілі ўжо пяць разоў. Яна правяла 15 сутак за кратамі за ўдзел у нядзельным маршы 4 кастрычніка. Тэрмін таго зняволення скончыўся 19 кастрычніка. Пакуль Алена адбывала пакаранне, яе судзілі яшчэ двойчы, але кожны раз справу адпраўлялі на дапрацоўку.

Жанчына не выйшла на свабоду пасля арышту: яе судзілі чацвёрты раз — ужо за марш 30 жніўня. Справу каторы раз адправілі на дапрацоўку, а пасля суда Алена Гнаук зноў трапіла пад варту. 22 кастрычніка, на пятым судзе, пенсіянерку аштрафавалі на 30 базавых і адпусцілі дадому.