Палітыка стала праблемай? Чаму беларус не стаў трэнерам "Легіі"

Беларус Аляксей Шпілеўскі не стаў трэнерам "Легіі" таму, што ніколі публічна не асуджаў рэжым Аляксандра Лукашэнкі. Такое меркаванне выказаў польскі журналіст партала Onet Мацей Калішук у сваёй калонцы.

Паводле ягоных слоў, кіраўніцтва "Легіі" спалохалася рэакцыі грамадства, перш за ўсё фанатаў.

Калішук задаецца пытаннем: навошта "Легія" наогул пачынала перамовы, ведаючы, што Шпілеўскі — беларус?

І дае такі адказ: магчыма, кіраўніцтва спадзявалася, што трэнер публічна адмовіцца ад падтрымкі ўладаў Беларусі. Аднак ён не збіраўся гэтага рабіць. Шпілеўскі пазбягае заяваў на палітычныя тэмы.

Сам Аляксей Шпілеўскі так пракаментаваў перамовы з "Легіяй":

— У мяне была канструктыўная размова з прадстаўнікамі кіраўніцтва "Легіі". Мне вельмі спадабаліся дух, філасофія і гісторыя клуба, а таксама яго вялікія традыцыі. У рэшце рэшт мы не дасягнулі дамоўленасці, — распавёў Шпілеўскі.

Уплыў фанатаў "Легіі"

Нагадаем, наколькі катэгарычныя фанаты "Легіі" і наколькі яны ўцягнутыя ў справы клуба. У апошнім туры Экстраклясы на хатнім стадыёне быў аншлаг. Фанаты "Легіі" вывесілі велізарны банер проста насупраць VIP-ложы і трэнерскага мастка з надпісам, які заклікаў "спыніць фінансаванне лайна".

Балельшчыкі відавочна засталіся незадаволеныя сезонам, крытыкавалі кіраўнікоў "Легіі" і заклікалі будаваць чэмпіёнскую каманду — інакш абяцалі байкатаваць клуб і не набываць квіткі і абанементы на новы сезон.

Куды прарочаць Шпілеўскага?

Пасля таго як "Легія" вызначылася з імем новага трэнера, з’явілася інфармацыя, што беларус можа ўзначаліць расійскі клуб "Пары НН", які напярэдадні звольніў іншага беларускага трэнера — Віктара Ганчарэнку.

Шпілеўскі не пацвердзіў, але і не абверг гэтую інфармацыю.

— Пакуль цяжка нешта сказаць пра маю будучыню. Мы мелі зносіны з расійскімі клубамі: і з ЦСКА, і з "Дынама", і з "Пары НН". На дадзены момант канкрэтных дамоўленасцяў няма — толькі размовы.

Ці з’яўляецца Расія прыярытэтам? Для мяне не так важная краіна, як якасны праект. Хай ён нават будзе ў Індыі — пры ўсім маім павазе. Паглядзім, што будзе ў бліжэйшыя дні ці тыдні, — адзначыў Шпілеўскі.

Дадамо, што раней Шпілеўскі заяўляў, што яго цікавіць заходні вектар уласнага развіцця.