Не кармілі чацвярых дзяцей некалькі сутак — пару пазбавілі бацькоўскіх правоў
Выязное пасяджэнне суда / "Мінск-Навіны"
Сямейную пару ў Мінску пазбавілі бацькоўскіх правоў. Выязное пасяджэнне суда над імі прайшло ў сацыяльна-педагагічным цэнтры Партызанскага раёна. Пазоўнікам выступіў прадстаўнік раённага ўпраўлення па адукацыі, піша дзяржаўнае інфармагенцтва "Мінск-Навіны".
Муж і жонка выхоўвалі шасцярых дзяцей, дваіх з якіх жанчына нарадзіла ў першым шлюбе. Пры падтрымцы дзяржавы сям'я атрымала дзве сумежныя кватэры на вуліцы Солтыса, але фактычна жыла толькі ў адной.
Ва ўпраўленне па адукацыі звярнуліся выхавальнікі з дзіцячага садка. Яны паведамілі, што дзеці не ходзяць ва ўстанову, а бацькі перашкаджаюць іх наведванню дома. Сацыяльнае расследаванне чыноўнікаў паказала, што муж і жонка больш за тры месяцы нідзе не працавалі і не маглі забяспечыць дзяцей. У доме, як паведамляецца, не было нават прадуктаў харчавання. У сакавіку 2024-га каардынацыйны савет непаўналетніх прызнаў, што дзеці знаходзяцца ў сацыяльна небяспечным становішчы (СНС).
Бацькі адмаўляліся пускаць у кватэру прадстаўнікоў службаў і ігнаравалі тэлефанаванні. Увайсці ў жыллё ўдалося толькі тады, калі дзверы адчынілі самі дзеці.
Потым бацькі ўладкаваліся на працу, навялі парадак у кватэры, забяспечылі запас прадуктаў. Аднак у ліпені зноў сышлі ў запой, а дзеці засталіся на чатыры дні без ежы. У кватэры, як паведамляецца, была антысанітарыя. Старэйшых дзяцей, 14 і 15 гадоў, забраў біялагічны бацька, а малодшых змясцілі ў сацыяльна-педагагічны цэнтр.
Камісія па справах непаўналетніх у жніўні 2024-га прызнала, што васьмігадовая дзяўчынка, сямігадовы хлопчык і чатырохгадовыя двайняты маюць патрэбу ў дзяржаўнай абароне. Ім надалі статус пакінутых без апекі бацькоў.
Бацькі, як сцвярджаюць чыноўнікі, пазбягалі кантактаў з зацікаўленымі службамі, не наведвалі прафілактычныя мерапрыемствы, не прайшлі лячэнне ад алкагалізму, не пайшлі на працу, назапасілі запазычанасці за камунальныя плацяжы і ўтрыманне дзяцей. Са снежня 2024-га яны не наведвалі дзяцей і не цікавіліся іх жыццём.
Суд пастанавіў пазбавіць іх правоў у дачыненні да чацвярых непаўналетніх дзяцей, перадаўшы тых на выхаванне ўпраўленню па адукацыі Партызанскага раёна.
