Нараджальнасць у Мінску за чатыры гады знізілася на 30%

— Калі ў 2020 годзе ў горадзе [Мінску, — Еўрарадыё] прынялі больш за 17 тысяч родаў, то ў 2024-м — крыху больш за 12 тысяч, — распавяла Смартпрэс загадчыца 4-й жаночай кансультацыі 1-й гарадской клінічнай бальніцы Мінска Аляксандра Шкарупа. — Акрамя таго, сярэдні ўзрост будучых маці расце: цяпер ён складае 30–40 гадоў. У гэтым узросце знаходзіцца 60% цяжарных жанчын у сталіцы.

Адзначаецца тэндэнцыя павелічэння колькасці цяжарных з суправаджальнымі захворваннямі:

— У наш цэнтр пераходзяць усе жанчыны Мінска, якія маюць саматычную паталогію — хранічную артэрыяльную гіпертэнзію, прыроджаныя і набытыя заганы сэрца, захворванні шчытападобнай залозы, цукровы дыябет 1 або 2 тыпу.

Калі ў 2020 годзе да нас было перамешчана крыху больш за 400 пацыентак, то ў 2024-м гэтая лічба перавысіла 700. Такім чынам, мы назіраем тэндэнцыю да зніжэння колькасці родаў, павелічэння ўзросту цяжарных жанчын і росту суправаджальных захворванняў, якія могуць ускладніць плынь цяжарнасці, — падсумавала Шкарупа.