На вечары дружбы ў Душанбэ Рахмон частаваў Лукашэнку гранатам (фота)
28 верасня ў Душанбэ адбудзецца саміт кіраўнікоў краін СНД.
Напярэдадні ва ўрадавай рэзідэнцыі прэзідэнт Таджыкістана Эмамалі Рахмон арганізаваў вечар дружбы для кіраўнікоў дзяржаў і кіраўнікоў дэлегацый удзельнікаў пасяджэння Савета кіраўнікоў дзяржаў СНД, піша president.tj.
У ім прынялі ўдзел кіраўнік Беларусі Аляксандр Лукашэнка, прэзідэнт Казахстана Нурсултан Назарбаеў, прэзідэнт Кыргызстана Саранбай Жээнбекаў, прэзідэнт Малдовы Ігар Дадон, прэзідэнт Азербайджана Ільхам Аліеў, прэзідэнт Расіі Уладзімір Пуцін, прэзідэнт Узбекістана Шаўкат Мірзіёеў і прэм'ер-міністр Арменіі Нікол Пашынян.
Гасцям паказалі выставу прыродных дароў Таджыкістана. Там можна было пабачыць садавіну і гародніну, сухафрукты і мёд ды іншыя дарункі таджыкскай зямлі.
На адным з фатаздымкаў можна пабачыць, як Эмамалі Рахмон частуе Аляксандра Лукашэнку гранатам.
