На наступным тыдні з Чырвонага касцёла пачнуць вываз маёмасці

На наступным тыдні з Чырвонага касцёла ў Мінску пачнецца вываз рухомай маёмасці. Пасля гэтага ў будынку нарэшце пачнуць рамотныя работы. Пра гэта дзяржаўнаму інфармагенцтву "Мінск-Навіны" заявіў дырэктар прадпрыемства "Мінская спадчына" Аляксандр Кохан.

Ён расказаў, якія канкрэтна рамонтныя работы будуць праводзіцца ў будынку: "Яны ўключаюць у сябе замену і рамонт унутраных і вонкавых інжынерных сетак і аднаўленчыя аздобныя працы. Была распрацавана праектна-каштарысная дакументацыя, якая прайшла адпаведную дзяржаўную экспертызу".

Пра вываз маёмасці з будынка "Мінская спадчына" дамовілася з пробашчам парафіі. Абмеркаванне вялося, к паведамляецца, на ўзроўні Мінска-Магілёўскай архідыяцэзіі.

У ноч на 26 верасня 2022 года ў будынку адбылося невялікае ўзгаранне, пасля чаго ўлады зачынілі касцёл для вернікаў і святароў. Будынак дагэтуль належыць дзяржаве, а вернікам давалі права толькі карыстацца ім. Улады заявілі, што будынку неабходны рамонт, аднак ніякіх работ там не вялі, а тэрміны пачатку рамонту пастаянна пераносілі. Пры гэтым спасылаліся на недапрацаваную праектна-каштарысную дакументацыю.