Лукашэнка выпусціў двух каталіцкіх святароў-палітвязняў
Вызваленыя ксяндзы (у цэнтры) / catholic.by
Лукашэнка памілаваў двух каталіцкіх святароў-палітвязняў — Анджэя Юхневіча і Генрыха Акалатовіча.
Акалатовіча судзілі за "здраду дзяржаве" і прызначылі яму 11 гадоў зняволення. Падрабязнасці крымінальнага пераследу Юхневіча невядомыя, але прысудзілі яму 13 гадоў калоніі.
У заяве Канферэнцыі каталіцкіх біскупаў Беларусі вызваленне ксяндзоў-палітвязняў звязваецца з кастрычніцкім візітам у Беларусь прадстаўніка Папы Рымскага кардынала Клаўдыё Гуджэроцці.
"Яго візіт надаў пазітыўны імпульс для далейшых кантактаў, важным вынікам якіх стала рашэнне прэзідэнта Рэспублікі Беларусь у знак міласэрнасці і павагі да Папы Рымскага памілаваць і вызваліць каталіцкіх святароў, якія адбывалі пакаранне ў месцах зняволення.
Непасрэдны і важкі ўдзел у працэсе прымалі прэфект Дыкастэрыі па справах Усходніх Касцёлаў кардынал Клаўдыё Гуджэроцці, Апостальскі нунцый у Рэспубліцы Беларусь Іньяцыё Чэффаліа і старшыня Канферэнцыі каталіцкіх біскупаў Беларусі арцыбіскуп Іосіф Станеўскі", — гаворыцца ў паведамленні.
