Мінску не хапае 5000 тон яблыкаў і сховішчаў для іх. І гэта толькі частка бяды

Мінску не хапае 5040 тон яблыкаў і сховішчаў. Мінгарвыканкам плануе дамовіцца з арганізацыямі, якія маюць спецыялізаваныя сховішчы, каб перадаць іх у арэнду гандлёвым сеткам для захоўвання імпартаваных яблыкаў.

Таксама абмяркоўваецца прымальная цана за захоўванне, каб гэтыя яблыкі можна было прадаваць па мінімальных рознічных цэнах. Пра гэта гаворыцца ў пратаколе сустрэчы Мікалая Снапкова з прадстаўнікамі асобных гандлёвых сетак. Дакумент, атрыманы ад BELPOL, ёсць у распараджэнні рэдакцыі Еўрарадыё.

У пратаколе таксама адзначаецца, што ў "Белаграпрамбанка" і "Беларусбанка" ўзніклі непаразуменні адносна працэдуры крэдытавання гандлёвых сетак для выплаты вытворцам 10-працэнтнай платы за плодаагароднінную прадукцыю, што закупляецца для рэспубліканскіх дзяржаўных патрэб. МАРГ давялося ўмяшацца, каб вырашыць з банкамі ўсе пытанні, якія перашкаджалі адкрыццю крэдытных ліній для гандлёвых сетак.

Якія яшчэ праблемы былі агучаныя на сустрэчы

Снапкоў быў праінфармаваны пра недапастаўкі кандытарскіх вырабаў у сталічныя гандлёвыя сеткі. Так, "Чырвоны Мазыранін" недапаставіў пасцілу, "Камунарка" — папулярныя вагавыя цукеркі, а "Спартак" — вафлі. Кіраўніцтва крам занепакоенае тым, што можа не хапіць патрэбнага асартыменту да навагодніх свят для падарункавых набораў.

Мікалай Снапкоў даручыў "Белдзяржхарчпрому", аблвыканкамам і Мінскаму гарвыканкаму ўзяць пад асаблівы кантроль забеспячэнне рынку шампанскім і ігрыстымі вінамі на калядныя і навагоднія святы.

Гандлёвыя сеткі таксама паведамілі пра недапастаўкі ялавічыны (ахалоджаных стэйкаў, вяндліны, кавалкаў, языка) і фасаванага філе птушкі. Акрамя таго, яны баяцца магчымага недахопу яек перад святочнымі днямі.