Магілёвец страляў з пнеўматычнай зброі па рабочых, якія абразалі дрэвы
Магілёвец абстраляў рабочых, якія абразалі дрэвы / mogilev.online
Чатыры гады абмежавання волі ("хімія") прысудзіў суд магілёўцу, які страляў з пнеўматычнай зброі па рабочых. Маладога чалавека прызналі вінаватым у асабліва злосным хуліганстве.
Інцыдэнт здарыўся ў лістападзе 2024 года па вуліцы Пралетарскай у Магілёве, піша mogilev.online. 25-гадовы гараджанін каля 12-й гадзіны дня прачнуўся ў сябе дома ад шуму з вуліцы. Вызірнуўшы ў акно, ён пабачыў, як рабочыя спілоўваюць галінкі дрэваў.
Маладому чалавеку не спадабаўся шум, а таксама тое, што рабочыя кідалі галінкі ды іншае смецце праз плот на яго тэрыторыю каля дома. Ён стаў сварыцца з рабочымі. Тыя адказалі, што смецце не кідалі і могуць увогуле паставіць аўтавышку проста ў ягоны двор.
Абурыўшыся, магілёвец узяў пнеўматычную зброю, зараджаную металічнай куляй, і хацеў стрэліць у кузаў машыны, але выпадкова пацэліў у рабочага. Ад стрэлу пераважна пацярпела куртка, у самога рабочага была толькі ранка ў раёне грудзей.
Суд стаў на бок работнікаў. Акрамя тэрміну пакарання магілёвец павінен выплаціць пацярпеламу 600 рублёў кампенсацыі маральнай шкоды і 20 рублёў за сапсаваную куртку.
