Магілёўская міліцыя зачыніла сетку салонаў прыгажосці

У Магілёве супрацоўнікі аддзела барацьбы з эканамічнай злачыннасцю зачынілі сетку салонаў прыгажосці. Прычынай называюць прадпрымальніцкую дзейнасць без ліцэнзіі.

33-гадовы мінчук, уладальнік сеткі, закупіў абсталяванне для касметалагічных паслуг. Супрацоўнікі фірмы, не маючы спецыяльнага дазволу, аказвалі медыцынскі сэрвіс.

За некалькі месяцаў дзейнасці даход сеткі перавысіў 100 тысяч рублёў. Як заяўляюць у міліцыі, прыбытак бізнесовец укладваў у далейшае развіццё кампаніі, а таксама выдаткоўваў на ўласныя патрэбы.

Следчыя пачалі крымінальную справу за прадпрымальніцкую дзейнасць без ліцэнзіі. У міліцыі падкрэсліваюць, што прадухілілі магчымыя негатыўныя наступствы для здароўя кліентаў гэтых салонаў.