КДК скардзіцца Лукашэнку, што гандлёвыя сеткі ствараюць свае пякарні

Буйныя гандлёвыя сеткі арганізуюць свае пякарні, і іх хлеб і хлебабулачныя вырабы ствараюць усё больш заўважную канкурэнцыю дзяржаўным хлебазаводам. На гэта кіраўнік Камітэту дзяржкантролю Васіль Герасімаў паскардзіўся Аляксандру Лукашэнку ў лісце ад 20 студзеня 2025 года. Дакумент з грыфам "Для службовага карыстання" аб'яднанне былых сілавікоў BelPol перадало выданню "Позірк".

Герасімаў адзначае, што ў 2024 годзе дзяржаўныя хлебазаводы працягвалі зніжаць выпуск прадукцыі. Гэта было выклікана "павышэннем ўзроўню канкурэнцыі ў хлебапякарнай галіне за кошт пашырэння сеткі прыватных вытворцаў, у тым ліку буйных сеткавых гандлёвых арганізацый".

Чыноўнік адзначыў, што згодна з інфармацыяй Белстата летась у краіне выраблена 233,4 тысячы тон хлеба і хлебабулачных вырабаў — на 4,5% менш, чым у 2023 годзе. "Пры гэтым, паводле аператыўнай інфармацыі, у 2024 годзе 30% хлебабулачных вырабаў выраблена непасрэдна аб'ектамі гандлю", — падкрэсліваецца ў дакуменце. Паводле Герасімава, урад не стварыў роўныя ўмовы для вытворцаў хлеба і гандлёвых сетак, нягледзячы на прапановы КДК.

Таксама ў КДК паведамілі, што летась правялі праверкі больш як 1000 аб'ектаў. Былі пачатыя тры крымінальныя справы на службовых асоб ААТ "Барысаўхлебпрам" (Мінская вобласць) і ААТ "Віцебскхлебпрам" — "паводле фактаў прычынення шкоды і атрымання хабараў".