Іспанія прызнае пратэрмінаваныя пашпарты беларусаў
Пашпарт, ілюстрацыйнае фота / БЕЛТА
Іспанія будзе прызнаваць пратэрмінаваныя пашпарты грамадзян Беларусі.
Апублікаваная інструкцыя, згодна з якой пашпарты грамадзян Беларусі ў Іспаніі будуць прызнавацца сапраўднымі нават пасля заканчэння тэрміну дзеяння — без неабходнасці атрымання cédula de inscripción, паведамляе прэс-служба Святланы Ціханоўскай.
Дасягнуць гэтага атрымалася ў выніку дамоўленасцяў Офіса Святланы Ціханоўскай з уладамі Іспаніі. 20 чэрвеня 2025 году Ціханоўская правяла перамовы пра гэта з міністрам замежных справаў Хасэ Мануэлем Альбарэсам. Дамоўленасці былі канчаткова замацаваныя ў студзені 2026-га пры падтрымцы іншых міністэрстваў Іспаніі.
Праблемы з пашпартамі ў беларускіх палітуцекачоў пачаліся пасля ўказу Лукашэнкі, выдаджзенага ў верасні 2023 года. Ён забараніў беларускім консульствам мяняць пратэрмінаваныя пашпарты: цяпер памяняць іх на новыя можна толькі на тэрыторыі Беларусі ў органах МУС. Для вялікай колькасці беларусаў, якія пакінулі радзіму, асцерагаючыся палітычнага пераследу, такія паездкі небяспечныя.
