Генпракурор назваў самыя карумпаваныя сферы ў Беларусі
Хабар, ілюстрацыйнае фота
За 2024 год у Беларусі зафіксавана 1031 карупцыйнае злачынства, паведамляе прэс-служба Генпракуратуры.
Самую вялікую долю займае хабарніцтва (45,1%) — больш за 70% падобных выпадкаў выяўленыя ў закупачнай дзейнасці, а таксама крадзяжы шляхам злоўжывання службовымі паўнамоцтвамі (32,8%). Пад крымінальную адказнасць трапілі 911 чалавек, прычым 14 з іх займалі адказнае становішча.
Найбольш карумпаванымі сферамі выявіліся сельская гаспадарка (224), прамысловасць (190), будаўніцтва (158) і гандаль (82). Пра гэта паведаміў генеральны пракурор Андрэй Швед.
Паводле яго развіццю карупцыі, акрамя "слабых асабістых якасцяў", спрыяюць наступныя фактары:
— недастатковая эфектыўнасць ведамаснага і ўнутранага кантролю;
— фармальнае выкананне функцый уладальніцкага нагляду;
— адсутнасць аднастайнага нарматыўнага рэгулявання сферы закупак за кошт уласных сродкаў прадпрыемстваў і арганізацый;
— недахопы падбору і расстаноўкі кадраў.
Разам з тым у Генпракуратуры заяўляюць, што ў структуры агульнай злачыннасці Беларусі карупцыя не перавышае 2%.
