Генпракуратура Літвы назвала памеры выплат затрыманым беларускім шпёнам

Грамадзяне Літвы, якіх затрымалі па падазрэнні ў шпіянажы на карысць Беларусі, — гэта сужыцелі, мужчына і жанчына. Ім больш за 40 гадоў, і яны жывуць не ў Вільні. Пра гэта паведаміў пракурор Артурас Урбяліс, перадае lrt.lt.

Паводле матэрыялаў справы, літоўцы самі прапанавалі супрацоўнічаць з беларускай вайсковай разведкай. Адзін з іх мэтанакіравана ўкараніўся ў Саюз стралкоў. Раней яны не траплялі ў поле зроку праваахоўных органаў Літвы.

Следства выявіла, што ў траўні 2022-га абвінавачаныя ездзілі ў Мінск. Там яны праз пасярэдніка дамовіліся наконт кантактаў і далейшай супрацы з прадстаўнікамі вайсковых структураў Беларусі.

Сужыцелі збіралі разнастайную інфармацыю ў Літве і Латвіі. Доступу да сакрэтнай інфармацыі яны не мелі, але сабраны матэрыял ацэньваецца як карысны для разведкі.

Таксама Урбяліс сказаў, якое ўзнагароджанне атрымлівалі шпіёны за сваю дзейнасць ад беларускіх структураў: "Не скажу, што гаворка ідзе пра сотні тысячаў, але гэта і 100, і 500 еўра — сумы былі розныя". Поўную суму ўзнагароджання за ўсе заданні пракурор не назваў.

Акрамя грошай шпіёнам даставаліся іншыя "бонусы": падарункі, кампенсацыі за паездкі, аплата пражывання, бясплатнае наведванне аквапарку ў Друскінінкаі, квіткі ў тэатр, на оперу.

Затрымалі іх у лістападзе 2023 года. 6 сакавіка крымінальная справа была перададзеная ў суд. Ім пагражае да 15 гадоў пазбаўлення волі.