Расійскі бізнесовец застрэліўся пасля размовы з сілавікамі пра беларускую фірму

Самагубства ўчыніў у Расіі 49-гадовы Аляксандр Хайдзін — камерцыйны дырэктар групы кампаній "Благо", якая займаецца вытворчасцю сланечнікавага алею, заўважыў сайт Reform.news.

Звесткі пра Хайдзіна з'явіліся ў выданні Baza, блізкім да расійскіх сілавікоў. Паводле гэтага выдання, Хайдзін перастаў выходзіць на сувязь увечары 15 студзеня. Яго цела знайшлі ў гаражы ў садовым таварыстве ў Ленінградскай вобласці. Паблізу ляжаў карабін. Мужчына пакінуў перадсмяротную запіску.

Жонка Хайдзіна Галіна расказала, што незадоўга да смерці яго выклікалі ў аддзел па эканамічнай бяспецы і супрацьдзеянні карупцыі МУС РФ. Сілавікі цікавіліся дзейнасцю беларускай кампаніі "Кубак".

Гэтая кампанія зарэгістраваная ў Мінску. Яна займаецца аптовым гандлем сланечнікавага шроту, збожжа, кармоў для сельскагаспадарчых жывёл, кармавых дабавак.