Цёпла і ў межах нормы. Кліматолаг — пра надвор’е восенню ў Беларусі

29/08/2025 - 16:48

Цёпла і ў межах нормы. Кліматолаг — пра надвор’е восенню ў Беларусі / t.me/gorodmozyr/

Лета ў Беларусі склалася даволі прахалодным і дажджлівым. Але ці застаецца шанец на цёплую восень? На гэтае і іншыя пытанні Еўрарадыё пра восеньскае надвор’е адказвае кліматолаг.

Восень будзе цёплай

Кліматычны эксперт Уладзіслаў Шумак, спасылаючыся на папярэднія прагнозы надвор’я супакойвае беларусаў: восень з найбольшай верагоднасцю будзе цёплай.

— Ападкі ў цэлым будуць прыблізна такія, як і павінны быць па кліматычнай норме, але, магчыма, у лістападзе будзе крыху больш дажджоў.

Канешне, цяжка дэталёва спрагназаваць надвор’е, бо сезонныя мадэлі даюць прыкладныя прагнозы. Гэта, дарэчы, звязана з узрастаннем розных выпадковых з’яў у сувязі са зменамі клімату. І гэтыя з’явы не звязаныя нават з ніжнімі слаямі трапасферы, а звязаныя са стратасферай, і іх вельмі цяжка вывучаць, таму што наўпрост няма такіх тэхнічных магчымасцяў.

Надвор’е ў верасні, кастрычніку і лістападзе

У верасні надвор’е будзе плюс-мінус прыблізным да кліматычнай нормы.

— Максімальная тэмпература ў першы месяц восені будзе дзесьці да 24 градусаў, істотных ападкаў пры гэтым не чакаецца. Таму можа быць дэфіцыт вільгаці ў глебе, што не вельмі добра для нашых аграрыяў. У верасні будзе знакамітае “бабіна лета”. Увогуле кліматолагі іх у Беларусі вылучаюць тры, таму будуць такія хістанні тэмпературы ад больш нізкай да цёплай.

Восень у Беларусі будзе цёплай

Кастрычнік таксама будзе цёплы, адзначае эксперт.

— Гэта ўжо такі, можна сказаць, пераходны месяц — пераход да больш частых цыклонаў, дажджоў, туманаў. Тут ужо пачнуцца замаразкі, асабліва на паўночнай частцы Беларусі. Але тым не менш у сярэднім кастрычнік будзе нават трошкі цяплей за кліматычную норму. Дзённая тэмпература будзе на ўзроўні 8-12 градусаў.

У лістападзе ападкаў будзе больш, а напрыканцы месяца чакаюцца і невялікія снегапады.

— Лістапад — гэта, зразумела, ужо пераход да зімы. Калі глядзець на мульцімадэльныя сводкі, надвор’е будзе вільготным і дастаткова мяккім. Снежны пакроў да канца месяца малаверагодны, але асобныя кароткачасовыя снегапады магчымыя. У прыватнасці гэта тычыцца паўночнага ўсходу Беларусі, то бок Віцебскай вобласці.

Кліматычныя анамаліі і няўстойлівае надвор'е — трэнд

Уладзіслаў Шумак расказвае, што ў сувязі з кліматычнымі зменамі надвор'е становіцца няўстойлівым і часам менш прадказальным.

— Цяпер не назіраюцца сезонная цеплыня або холад. Зараз гэта менавіта такія вялікія дыяпазоны, перапады тэмператур і перапады нават ападкаў. Або суха, або лье вельмі моцна. Гэта і ёсць кліматычныя змены.

Раней такія з’явы былі анамаліяй, цяпер — гэта трэнд. За апошнія дзесяцігоддзі ў Беларусі назіраецца павелічэнне сярэдняй тэмпературы дзесьці нават на паўтара працэнта. І цёплыя сезоны нават у зімні час будуць сустракацца ўсё часцей. Увогуле ў параўнанні з кліматам 20 стагоддзя шансы на больш мяккую восень павялічваюцца.

Што будзе з ураджаем

Наконт збору ўраджаю эксперт робіць выснову, што ён будзе не самым лепшым, і гэта тычыцца у першую чаргу дрэннага надвор'я ў траўні і чэрвені.

Ураджай зерневых культур і кукурузы не пацярпеў ад летніх залеў

— У найбольшай ступені пацярпелі садавіна і гародніна — праз нізкія тэмпературы ў траўні і чэрвені проста ўсё памерзла, калі яшчэ расліны ўтваралі кветкі. У меншай ступені гэта тычыцца зерневых культур і бульбы.

Кукуруза таксама больш устойлівая, таму што для нарошчвання вегетатыўнай масы ёй патрэбная вада, а вады было шмат у гэтым годзе.

З-за залеў, канешне, былі прыклады, калі вялікія тэрыторыі проста залівала вадой, а гэта не вельмі добра для раслін.

Ну, у цэлым будзем адсочваць маніторынг аграрных рынкаў, не толькі Беларусі, але і суседніх краін. А ён паказвае, што ад кліматычных праяў пацярпелі не толькі беларускія аграрыі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.