Былая беларуская журналістка трапіла пад санкцыі Чэхіі

У санкцыйны спіс Чэхіі трапілі былая беларуская журналістка Наталля Судлянкова і супрацоўнік расійскай спецслужбы ГРУ Аляксей Шаўроў. Раней Судлянкова атрымала ў Чэхіі прытулак, але цяпер яна мусіць пакінуць краіну на працягу 30 дзён. Пра гэта паведамляе Радыё Свабода са спасылкай на Службу бяспекі і інфармацыі Чэхіі (BIS).

Міністр замежных спраў Ян Ліпаўскі заявіў, што Судлянкова працуе на расійскую ваенную разведку ГРУ і на працягу многіх гадоў таемна і свядома працавала на некалькі расійскіх арганізацый у Чэхіі. "Яе дзейнасць фінансавалася наўпрост з Расіі. За апошнія гады ёй заплацілі дзясяткі тысяч еўра ў крыптавалюце", — цытуюць Ліпаўскага чэшскія СМІ.

Прэм'ер-міністр Пётр Фіяла са спасылкай на даныя чэшскіх спецслужбаў сказаў, што Судлянкова выконвала заданні ГРУ ў Чэхіі, якія ішлі наўпрост з Масквы, а кіраваў ёй Шаўроў. Акрамя ГРУ Судлянкова, як сцвярджаюць чэшскія спецслужбы, супрацоўнічала з расійскай карпарацыяй "Расатам", Фондам падтрымкі і абароны правоў суайчыннікаў, мела дачыненне да грамадскай арганізацыі "Несмяротны полк".

Паведамляецца, што Судлянкова па даручэнні ГРУ арганізавала публікацыю некалькіх артыкулаў у чэшскіх СМІ. Таксама яна адстойвала інтарэсы расійскага алігарха Алішэра Усманава, які знаходзіцца пад санкцыямі.

У Беларусі Судлянкова ўваходзіла ў апазіцыйную Аб'яднаную грамадзянскую партыю. Прытулак у Чэхіі яна атрымала ў снежні 1999 года праз пераслед: яна балатавалася ў парламента ад АГП і  абвінавачвалася ў фінансавых злачынствах.

У Чэхіі Судлянкова працавала галоўным рэдактарам рускамоўнага штодыднёвіка "Пражский телеграф", таксама супрацоўнічала з Радыё Свабодная Еўропа/Радыё Свабода і з часопісамі Týden і Lidové noviny.