Як зніклая Анжаліка Мельнікава трапіла ў каманду Паўла Латушкі?

01/04/2025 - 15:13

Анжаліка Мельнікава і Павел Латушка / калаж Улада Рубанава, Еўрарадыё

Зніклая спікерка Каардынацыйнай рады Анжаліка Мельнікава працавала разам з камандай Народнага антыкрызіснага ўпраўлення Паўла Латушкі. Паводле Латушкі, яе рэзюмэ НАУ атрымала праз калегаў у ініцыятыве "Сумленныя людзі".

Да 2022 года лідарка "Сумленных людзей" Алена Жываглод працавала з НАУ. Пасля яе адыходу ў 2022 годзе да праекта далучылася Мельнікава. Еўрарадыё спытала Жываглод, як "Сумленныя людзі" парэкамендавалі Мельнікаву Паўлу Латушку.

Характарыстыка, якую Алена тады магла выдаць Мельнікавай, была вельмі кароткай — камунікабельная і амбіцыйная.

"Адзін ці два разы бачыліся на працоўных сустрэчах"

Жываглод пазнаёмілася з Мельнікавай яшчэ ў Беларусі ў 2016 ці 2017 годзе. Але гэта было шапачнае знаёмства.

— Я ў той час была кіраўніцай агенцтвам маркетынгавых сэрвісаў, а яна працавала ў піяр-службе кампаніі Coca-Cola. Адзін ці два разы я бачыла яе падчас працоўных сустрэч, але наўпрост мы не працавалі, — расказвае Жываглод Еўрарадыё.

Пасля ад'езду з Беларусі сям'я Мельнікавых адправілася ў Кіеў, а адтуль — у Беласток. Сама Мельнікава расказвала, што працавала з фондам "Беларусь 2020" і разам з сяброўкай Марынай Ляшчэўскай дапамагала уцекачам. Расказвала таксама, што менавіта тады яна пазнаёмілася з камандай Паўла Латушкі.

— Мы шукалі чалавека, які мог бы заняцца ў тым ліку пытаннямі фандрайзінгу. Яна прыйшла валанцёрам у НАУ, з сакавіка 2022 года пераехала з Беластока ў Варшаву. Фармальна яна была прынятая на працу ў Народнае антыкрызіснае кіраванне з чэрвеня 2022 года, — расказаў Еўрарадыё кіраўнік НАУ.

Алена кажа, што магла толькі коратка апісаць кандыдатку на пасаду ў каманду Латушкі.

— Мне здаецца, я не раіла Анжаліку, але давала каментар па ёй, калі Анжаліка перадавала рэзюмэ ў НАУ. Спярша яна хацела падключыцца да "Сумленных людзей", але мы яе не ўзялі. Шчыра кажучы, я дрэнна памятаю, чаму.

Анжаліка тады напісала ў сацсетках маёй калезе, якая працавала з ёй у Coca-Cola трошачкі больш, чым я. Яна спытала, ці можна папрацаваць або паваланцёрыць. Спытала, як трапіць у НАУ, як пагутарыць з Паўлам Паўлавічам. І ўжо мая калега перадавала ў НАУ рэзюмэ Анжалікі. І тады пра Анжаліку я сказала тое самае, што магу сказаць цяпер: я ведаю яе вельмі шапачна.

Тады я магла характарызаваць яе толькі як чалавека яркага, камунікабельнага, можа быць, часам беспардоннага, амбіцыйнага, актыўнага.

У Каардынацыйнай радзе Жываглод і Мельнікава таксама не сустрэліся. Алена была віцэ-спікеркай падчас другога склікання КР, але склала мандат раней, чым прайшлі выбары ў наступнае скліканне.

— Атрымліваецца, што мы ніколі не працавалі разам у камандзе.

Апошні раз я бачылася з Анжалікай у пачатку снежня ў Вільні падчас Стратдыялога з ЗША [Стратдыялог — гэта пляцоўка для падтрымання сталых стасункаў дэмсілаў Беларусі з урадам ЗША. — Еўрарадыё]. Гэта былі нейкія дыялогі на кава-брэйку.

Быў агульны сазвон па тэме так званых выбараў 2025-га года. Тады яна прадстаўляла або Каардынацыйную раду, або НАУ. А я прысутнічала на тым сазвоне ад "Сумленных людзей". Насамрэч гэта мінімальнае ўзаемадзеянне.

"Я не веру, што ў Анжалікі магла быць фінансавая матывацыя"

Мы спыталі ў Алены Жываглод пра яе версіі знікнення Анжалікі Мельнікавай.

— У мяне некалькі версій: дэпрэсія ці псіхалагічныя цяжкасці, вярбоўка або гвалт. Усе тры могуць быць. Але лагічнай і стройнай гісторыі ў мяне няма.

Калі я даведалася пра яе знікненне, былі слёзы і ўсе думкі былі пра гвалт і пра тое, што Анжаліку вывезлі. Калі стала вядома, што і дзеці з'ехалі, і тэлефон на тэрыторыі Беларусі, то стала з'яўляцца версія пра вярбоўку (шантажом, сілай).

Але лепш хай пераможа гэтая версія, хай гэта ўнясе ўклад у разлад даверу ў дэмсілах, хай лепш будзе так — і чалавек будзе жывы і здаровы.

Што тычыцца спекуляцый пра грошы — я нічога не ведаю пра гэта. Але тое, як я разумею чалавека, — я не веру, што ў Анжалікі магла быць фінансавая матывацыя. Гэта не ўпісваецца ў партрэт Анжалікі, хоць мы і знаёмыя шапачна. Мне не здаецца, што чалавек мог рызыкаваць рэпутацыяй, крадучы грошы.

Храналогія падзей

Паводле віцэ-спікеркі КС Станіславы Гліннік, Мельнікава адышла ад спраў у КР яшчэ ў лютым. Тады яна ўзяла два тыдні адпачынку. У пачатку сакавіка Мельнікава сказала чальцам КР, што ў яе ковід і таму яна будзе радзей удзельнічаць у агульных сазвонах.

Апошні раз Гліннік пагаварыла (голасам) з Мельнікавай 7 сакавіка. Спікерка КР мусіла прыйсці на мерапрыемства, арганізаванае адной з амбасадаў, але так і не з'явілася на ім. Увечары яна расказала Гліннік, што ў яе пагоршыўся стан здароўя.

Апошні раз чальцы Рады стэлефаноўваліся з Мельнікавай днём 21 сакавіка — яе камера была выключаная. "Здаецца, яна кашляла", — сказаў Еўрарадыё адзін з удзельнікаў той размовы, ускосна пацвердзіўшы, што Мельнікава насамрэч дрэнна пачувалася.

У інтэрв'ю "Белсат" выканаўца абавязкаў Мельнікавай у КР Станіслава Гліннік расказала, што 24 сакавіка Анжаліка прысутнічала на адным з агульных сазвонаў, якія не тычацца дзейнасці Каардынацыйнай рады. Са слоў Гліннік, якая не ўдзельнічала ў гэтым сазвоне, Мельнікава выходзіла на сувязь з уключанай камерай.

Лічыцца, што з 25 сакавіка яна больш не выходзіла на сувязь. СМІ даведаліся пра знікненне Мельнікавай толькі ў пятніцу, 28 сакавіка. У нядзелю, 30 сакавіка, факт знікнення пацвердзіла МУС Польшчы. Паводле звестак ведамства, Мельнікава знаходзіцца за межамі краіны ўжо "некалькі тыдняў". Ні ў кога няма дакладных звестак пра тое, як даўно яна пакінула Польшчу.

Былы муж спікеркі Андрэй Мельнікаў, паводле звестак Еўрарадыё, як мінімум з сакавіка 2025 года знаходзіцца на тэрыторыі Беларусі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.