Белы дом ацэньвае выдаткі на далучэнне Грэнландыі да ЗША — The Washington Post

Белы дом ацэньвае выдаткі на далучэнне Грэнландыі да ЗША, піша The Washington Post са спасылкай на ўласныя крыніцы. Спецыялісты падлічваюць патэнцыйны кошт утрымання Грэнландыі ў выпадку яе набыцця, уключна з прадастаўленнем дзяржаўных паслуг для яе 58 тысяч жыхароў. Таксама ў адміністрацыі Дональда Трампа спрабуюць зразумець, які даход можна атрымаць ад прыродных рэсурсаў Грэнландыі.

Паводле аднаго з варыянтаў, урад Грэнландыі атрымае ад ЗША больш выгадную прапанову, чым субсідыі Даніі ў памеры каля 600 млн долараў. А далей плануецца галасаванне жыхароў Грэнландыі. Пакуль яны "план Трампа" не падтрымліваюць.

Дакладныя эканамічныя выгады ад мінеральных рэсурсаў Грэнландыі застаюцца няяснымі, паколькі суровы клімат рэгіёну ўскладняе працэс здабычы карысных выкапняў (больш за 80% тэрыторыі вострава пакрыта лёдам).

Трамп неаднаразова выказваўся наконт магчымага далучэння Грэнландыі да Злучаных Штатаў і тлумачыў такую неабходнасць "нацыянальнай бяспекай". Ён гаварыў, што гатовы купіць або нават забраць сілай аўтаномную арктычную тэрыторыю Даніі (чальца ЕС і саюзніка ЗША ў NATO). Яго вабіць абароннае і эканамічнае значэнне вострава — праз Грэнландыю пралягае самы кароткі шлях з Еўропы ў Паўночную Амерыку.