"Беларуськалію" пагражае штраф за злоўжыванне дамінуючым становішчам на рынку

Міністэрства антыманапольнага рэгулявання і гандлю вынесла папярэджанне "Беларуськалію".

Чыноўнікі абвінавацілі прадпрыемства, што яно скарысталася дамінуючым становішчам на рынку аптовай рэалізацыі мінеральнага канцэнтрату — галіту. "Беларуськалій", як кажуць у МАРГ, усталяваў дыскрымінацыйныя ўмовы па аб'ёму адгрузкі тавару. Гэта і стала нагодай для папярэджання.

У ведамстве адзначаюць, што папярэджанне — гэта прэвентыўная мера. Калі прадпрыемства выканае ўсе ўмовы, прапісаныя ў папярэджанні, антыманапольнае расследаванне спыняецца.

У іншым разе МАРГ пагражае адказнасцю за парушэнне антыманапольнага заканадаўства. Адказнасць за парушэнне антыманапольнага заканадаўства ў частцы злоўжывання дамінуючым становішчам цягне накладанне штрафу — ад 21 тысячы рублёў і звыш 3 мільёнаў рублёў.