Беларуска Лілія Яноўская ўзышла на пік Анапурна і паставіла новы рэкорд
Лілія Яноўская ў гарах / фота з яе старонкі ў Фэйсбуку
7 красавіка ў 9:10 раніцы паводле мясцовага часу 65-гадовая беларуска Лілія Яноўская ўзышла на Анапурну ў Гімалаях. Яна стала найстарэйшым чалавекам, якому ўдалося ўзысці на гэты пік.
Вышыня Анапурны, размешчанай у паўночна-цэнтральным Непале, складае 8091 м. Гэта дзясятая па вышыні гара на Зямлі.
Цяпер жанчына адпачывае ў лагеры №3 перад спускам у базавы лагер.
Лілія Яноўская ўзнялася ўжо на 9 з 14 пікаў, вышыня якіх больш за 8000 метраў. Раней яна ўзняла нацыянальны бел-чырвоны-белы сцяг на Эверэсце.
Лілія Яноўская нарадзілася ў Івянцы, жыла ў Мінску. У 1990-я яе сям'я эмігравала ў Канаду. Ва ўзросце 50 гадоў жанчына захапілася альпінізмам. Сярод заваяваных ёю вяршыняў — Аканкагуа (6962 м, найвышэйшы пік у Паўднёвай Амерыцы), гара Матэрхорн ў Швейцарыі (4478 м), Рэйнір ў ЗША, стратавулканы ў Перу, Мексіцы і Эквадоры.
