Аварыя ў Кобрыне: частка горада без святла
Кобрын / t.me/kobrin_online/
24 лютага частка Кобрына засталася без электрычнасці. Як паведамляе "Брэстэнерга", "тэхналагічны збой у працы абсталявання" адбыўся на адной з падстанцый (ПС-110 "Кобрын-Заходняя") а 4-й гадзіне раніцы. У некалькіх раёнах знікла святло.
Энергетыкі адзначаюць, што "ў выніку аператыўных пераключэнняў большая частка спажыўцоў запітана і электразабеспячэнне ў дамах адноўлена". Аднак па стане на 8-ю гадзіну адключанымі заставаліся 36 трансфарматарных падстанцый, 6 высакавольтных ліній, адзін населены пункт і адна кацельня (для забеспячэння яе працы падключылі дызельны генератар). МНС паведамляе, што без святла застаюцца паўтысячы прыватных дамоў.
"Для забеспячэння працы абсталявання на час аднаўленчых работ на падстанцыі" ў Кобрын павінны прывезці пяць генератараў.
У горадзе працуе раённая камісія па надзвычайных сітуацыях па пытанні ліквідацыі аварыйнага адключэння электрычнай падстанцыі і звязаных з ім наступстваў.
