Асуджаны жыхар Гомеля, які ў 2022-м у адзіночку спыніў цэх свайго прадпрыемства

Суд Савецкага раёна Гомеля асудзіў Івана Памесячнага на тры гады калоніі ўзмоцненага рэжыму. Ён працаваў наладчыкам станкоў і маніпулятараў з праграмным кіраваннем на Гомельскім заводзе пускавых рухавікоў імя Панамарэнкі, і ў лістападзе 2022-га ў адзіночку спыніў цэх прадпрыемства. Як паведамляе прэс-служба Гомельскага абласнога суда, мужчына скарыстаўся "свабодным доступам да ўсяго абсталявання, выдаліў доступ да сістэмных файлаў, прывёўшы ў няспраўны стан праграмнае забеспячэнне (камп'ютарную інфармацыю), заблакаваўшы камп'ютарную сістэму". Сцвярджаецца, што Памесячны зрабіў гэта "з помсты за нібыта нявыплачаную ў поўным аб'ёме заработную плату".

Учынак наладчыка стаў прычынай "цяжкіх наступстваў у выглядзе матэрыяльных выдаткаў". Прадпрыемству давялося прыцягваць падрадную арганізацыю, якая распрацоўвала новыя праграмы, дакументацыю. Гэта каштавала яму 99 тысяч рублёў (раней памер шкоды называлі меншы — 55 тысяч рублёў). Амаль усю гэтую суму абавязалі выплаціць асуджанага.

Іван Памесячны скончыў Гомельскі аўтамеханічны каледж, факультэт машынабудавання Мазырскага педуніверсітэта. Акрамя працы на заводзе, ён падпрацоўваў вясельным фатографам.