759 атак на беларускіх журналістаў адбылося ў 2023–2024 гг. — даклад БАЖ і JFJ
Акцыя салідарнасці з палітзняволенымі журналістамі ў Вільні / БАЖ
За 2023-2024 гады было зафіксавана 759 атак/пагроз у адносінах да прафесійных і грамадзянскіх медыяў і рэдакцый традыцыйных і анлайн-СМІ. Пра гэта гаворыцца ў адмысловым дакладзе, які падрыхтавалі фонд Justice for journalists і Беларуская асацыяцыя журналістаў.
Адзначаецца, што цяпер за кратамі ў Беларусі знаходзіцца 41 супрацоўнік СМІ (па стане на канец 2024 года іх было 45). Ад канца 2023 года беларускія ўлады забіраюць у недзяржаўных медыяў лакальныя інтэрнэт-дамены, што прыводзіць да страты аўдыторыі.
Паводле статыстыкі БАЖ, з 2020 года Беларусь пакінулі каля 400 журналістаў. Астатнія працуюць у падполлі або змянілі прафесію.
У дакладзе за 2024 год арганізацыя "Рэпарцёры без межаў" паставіла Беларусь на чацвёртае месца ў свеце па колькасці зняволеных журналістаў. Наша краіна лічыцца самай небяспечнай для медыйшчыкаў у Еўропе.
Пачынаючы з 2020 года Мінінфарм унёс у рэспубліканскі спіс "экстрэмісцкіх" матэрыялаў 6565 акаўнтаў, прычым дзве тысячы былі далучаныя туды ўжо ў 2024 годзе. Доступ да гэтых рэсурсаў на тэрыторыі Беларусі блакуецца, а іх распаўсюд пагражае адміністрацыйнай і крымінальнай адказнасцюь.
У дакладзе гаворыцца, што практычна ўсе інцыдэнты супраць работнікаў медыяў ініцыявалі ўлады. 96% усіх зафіксаваных інцыдэнтаў адбываліся праз судовы і/ці эканамічны ціск. У 2017–2020 гадах атакі з боку ўлады складалі 83–85% пагроз, а ў 2021–2022 гадах гэты паказчык вырас да 94%.
У 2023-2024 гадах колькасць фізічных пагроз для журналістаў паменшала, бо самі медыйшчыкі пераважна выехалі з краіны.
